Ο σεβνταλής

Προβολή Τραγουδιού

Καλλιτέχνες: Ματθαίος Τσαχουρίδης, Σοφία Νικολαΐδη, Στάθης Νικολαΐδης

Ο σεβνταλής ο άνθρωπον
ας λέγω σας ντ’ ευτάει
Πάντα σ̌ασ̌ιρεμένος έν’,
’κι ’ξέρ’ πού κέσ’ θα πάει

Ανάθεμα σε, νε σεβντά,
ντίλεον χρώμαν είσαι;
Αρ’ ας σ’ εμόν το καρδόπον
ερίζωσες και κείσαι

Για τ’ εσέν τρέχ’νε τα δάκρυ͜α μ’
και άλλο ’κι τελείνταν
Αρ’ εγώ τοπλαεύ’ ατα,
έναν λιμνίν γομούνταν

Εμέν η σφαίρα ’κι σκοτών’,
μαχ̌αίρ’ γεράν ’κι ανοί͜ει με
Εμέν σκοτών’ το τρυγόνι μ’
ντο πάω και ’κι ανοί͜ει με

Τ’ αρνόπο μ’ όντες κρούει σο νου μ’
και αρχινώ και κλαίω
Όθεν στάζ’νε τα δα̤κρόπα μ’
τα χορταρόπα καίγω

Εμέν η σφαίρα ’κι σκοτών’,
μαχ̌αίρ’ γεράν ’κι ανοί͜ει με
Εμέν σκοτών’ το τρυγόνι μ’
ντο πάω και ’κι ανοί͜ει με

Γλωσσάρι

Κείμενο	Επεξήγηση	Ετυμ. Ρίζα
ανοί͜ει	ανοίγει
αρνόπο	αρνάκι, χαϊδευτική προσφώνηση γυναίκας
ας σ’	(ας σου) από του, από τότε που/αφότου, (ας σο) από το/τα
ατα	αυτά
γεράν	πληγή, τραύμα	yara
γομούνταν	γεμίζουν, βουρκώνουν, κομπιάζουν
δα̤κρόπα	(υποκορ.) δάκρυα
εμόν	δικός/ή/ό μου	ἐμοῦ
έν’	είναι
ευτάει	κάνει, φτιάχνει	εὐθειάζω
καρδόπον	καρδούλα
κείσαι	κείτεσαι, ξαπλώνεις
κέσ’	εκεί μέσα, προς τα εκεί	κέσου<κεῖσ’<κεῖσε<ἐκεῖσε
’κι	δεν	οὐκί<οὐχί
κρούει	χτυπάει	κρούω
λιμνίν	λίμνη
μαχ̌αίρ’	μαχαίρι
ντίλεον	τί λογής;
όθεν	όπου, οπουδήποτε, σε όποιον
όντες	όταν
σ̌ασ̌ιρεμένος	σαστισμένος, που τα έχει χαμένα	şaşırmak
σεβντά	αγάπη, έρωτας	sevda/sevdā
σεβνταλής	ερωτοχτυπημένος, ερωτευμένος	sevdalı
στάζ’νε	στάζουνε
τελείνταν	(αμτβ.)τελειώνουν, εξαντλούνται, μτφ. πεθαίνουν
τοπλαεύ’	μαζεύω/ει, συγκεντρώνω/ει	toplamak
τρέχ’νε	τρέχουν
τρυγόνι	το πουλί τρυγόνι, χαϊδευτική προσφώνηση γυναίκας
χορταρόπα	χορταράκια