Προβολή Τραγουδιού

Ο τραγωδι͜άνον

Καλλιτέχνες: Γεώργιος Εμμανουηλίδης, Κωστίκας Κωνσταντινίδης

Τη χαράς πουλία
είναι τα παιδία
ο τραγωδι͜άνον και -ν- ο λυριτζ̌ής
Παντρεύ’ το πουλόπο μ’,
λύεται το ψ̌όπο μ’
Εγώ -ν- είμαι τραγουδιστής

Άλλος παίρ’ την κάλη μ’,
κρούγω το κιφάλι μ’
Εσύ, πρέπ’ ξαν να τραγωδείς!
Τα πουλόπα λένε
τη σεβντάν και κλαίγ’νε,
τραγουδάνε «ρίζα μ’, μη πονείς!»

Σην χαράν θ’ επέγ’να
και σεΐρ’ θ’ ετέρ’να
έναν τραγωδι͜άνον και λυριτζ̌ήν
Θ’ έμ’νε χαρεμένον,
καλοφορεμένον,
πολλά μερακλίν και σεβνταλίν

Ντό ν’ ευτάγω ο μαύρον;
’κι παίρ’ με -ν- ο Χάρον!
Εγώ υποφέρω και πονώ
Τη σεβντά μ’ αντρίζ’νε
κι εμέν ’κι νουνίζ’νε
Εγώ, ξαν πρέπ’ να τραγωδώ

Γλωσσάρι

Κείμενο	Επεξήγηση	Ετυμ. Ρίζα
αντρίζ’νε	αντρίζουν, παντρεύουν, παντρεύονται
έμ’νε	ήμουν
επέγ’να	πήγαινα
ετέρ’να	κοιτούσα
ευτάγω	κάνω, φτιάχνω	εὐθειάζω
κάλη	η αγαπητή σύζυγος, η σύζυγος
’κι	δεν	ουκί<οὐχί
κιφάλι	κεφάλι
κλαίγ’νε	κλαίνε
κρούγω	χτυπώ
λύεται	λιώνει
μερακλίν	μερακλίδικο
νουνίζ’νε	σκέφτονται
ξαν	πάλι, ξανά
παιδία	παιδιά
πολλά	πολλά (επίθ.), πολύ (επίρ.)
πουλόπα	πουλάκια
πουλόπο	πουλάκι
σεβντά	αγάπη, έρωτας	sevda/sevdā
σεβνταλίν	ερωτοχτυπημένη/ο, ερωτευμένη/ο, ερωτικό	sevdalı
σεΐρ’	θέαμα πρόσφορο για διασκέδαση (τερώ σεΐρ: κοιτώ κάτι παραμένοντας αμέτοχος)	seyir/seyr
τραγωδείς	τραγουδάς
τραγωδώ	τραγουδάω
χαρεμένον	χαρούμενο
ψ̌όπο	ψυχούλα