Ανθούλα μ’ και πατούλα μ’

Άσπρα τ’ ομμάτι͜α σ’ κι έμορφα
τ’ οφρύδι͜α τ’ς πογιαμάδες
Για τ’ εσέν ψ̌όπα λύγουνταν
και για τ’ εσέν γιοσμάδες

Ανθούλα μ’ και πατούλα μ’
και για τ’ εσέν, σ̌ουμπούλα μ’
Η καρδι͜ά μ’ εξαπέσ’ εμπαίν’
εθαρρείς έχ̌’ φουρτούναν

Με τα τσ̌απράζι͜α τ’ ομμάτι͜α σ’
αποφκακέσ’ τερείς με
Με τα τσ̌αλούμι͜α τρως την ψ̌η μ’
και φίλεμαν ’κι δί’ς με

Ανθούλα μ’ και πατούλα μ’
και για τ’ εσέν, σ̌ουμπούλα μ’
Η καρδι͜ά μ’ εξαπέσ’ εμπαίν’
εθαρρείς έχ̌’ φουρτούναν

Άλλο με το ψ̌όπο μ’ μη παί͜εις
άλλο με την καρδία μ’
Σα γόνατα σ’ κρεμίγουμαι
κλώστ’ τέρεν με αλλομίαν

Ανθούλα μ’ και πατούλα μ’
και για τ’ εσέν, σ̌ουμπούλα μ’
Η καρδι͜ά μ’ εξαπέσ’ εμπαίν’
εθαρρείς έχ̌’ φουρτούναν